“Оюу толгой” 2021 оны хоёрдугаар улирлын тайлангаа танилцууллаа

• Дэлхийд өрсөлдөхүйц аюулгүй ажиллагааны гүйцэтгэлээ хадгаллаа
• Ил уурхайн үйл ажиллагаа эхэлсний арван жилийн ой тохиов
• “КОВИД-19” цар тахлын эсрэг Өмнөговь аймагтай нягт хамтран ажиллаж байна
• Нэг тонн хүдэр боловсруулахад зарцуулсан усны хэмжээг хамгийн доод түвшинд барьж байна
• Дотоодод зарцуулсан мөнгөн хөрөнгө 12.7 тэрбум ам.доллар хүрлээ
• Үндэсний худалдан авалтад 3.7 тэрбум ам.долларыг зарцуулав

“Оюу толгой” компани 2021 оны хоёрдугаар улирлын үйл ажиллагааны голлох үзүүлэлт, гүний уурхайн төслийн явц болон цар тахлаас сэргийлэх чиглэлд авч хэрэгжүүлж буй арга хэмжээнүүдээ танилцууллаа.

2021 оны хоёрдугаар улиралд Монгол Улсад бүртгэгдсэн “КОВИД-19” өвчний дотоодын тархалт өсөж, түүнээс улбаалан улсын хэмжээнд болон Өмнөговь аймагт тогтоосон шат дараалсан хөл хориотой холбоотой ажилчдын ээлж солих үйл явцыг хэвийн явуулахад хүндрэлтэй байлаа. Иймд уурхайн талбар дээрх ажилчдын тоо энэ улиралд төлөвлөсөн хэмжээнээс 25 хувиар бага байсан. “КОВИД-19” цар тахлын хязгаарлалтууд ил уурхайн үйл ажиллагаа болон гүний уурхайн бүтээн байгуулалтын үйл явцад багагүй нөлөөллөө. Гэсэн ч бид эх орондоо бүтээж буй үнэ цэнээ улам бүр нэмэгдүүлэхийн тулд холбогдох суурь шалгууруудыг ханган гүний уурхайн огтлох малталтын ажлыг эхлүүлэхэд тэргүүлэх ач холбогдол өгөн ажиллаж байна. 2021 оны долоодугаар сарын есний өдрийн байдлаар манай ажилчдын 93 хувь “КОВИД-19” өвчний эсрэг вакцинд бүрэн хамрагдаж, бид уурхайн талбарт зохих дэглэмийг мөрдүүлж байна. Түүнчлэн “Оюу толгой” компани ажилчдынхаа болон орон нутгийн иргэдийн эрүүл мэнд, аюулгүй байдлыг хангахаар Засгийн газрын эрх бүхий байгууллагуудтай хамтран ажиллаж байна.

“Оюу толгой” компанийн Гүйцэтгэх захирлын үүрэг гүйцэтгэгч Жак ван Тондэр “Бид өөрсдийн үйл ажиллагаа болон уурхайн талбар дахь “КОВИД-19” цар тахлын нөхцөл байдал, авч хэрэгжүүлж буй арга хэмжээнийхээ талаарх мэдээллийг Өмнөговь аймгийн удирдлагуудад ил тод, нээлттэй өгч, хамтран ажиллаж байна. “Оюу толгой” компани Өмнөговь аймагт 9,000 тун “Спутник-V” вакцин болон шаардлагатай хувийн хамгаалах хэрэгслийг хандивласан нь манай хамт олон дэлхий дахиныг нөмөрсөн цар тахалтай орон нутгийн иргэдтэйгээ хамтран хэрхэн тэмцэж байгааг харуулж байна. Энэхүү хүнд, хэцүү цаг үед уурхайн үйл ажиллагааг аюулгүй, хэвийн явуулахаар чармайн ажиллаж буй нийт ажилчид, ханган нийлүүлэгч байгууллагууд болон бидний үйл ажиллагааг дэмжиж буй төрийн албан хаагчдад гүн талархал илэрхийлье. Оюу толгойн гэр бүл өнгөрсөн арван жилийн турш үнэ цэн бүтээлцэж, Монгол Улсын эдийн засагт багагүй хувь нэмрийг оруулсан ил уурхайнхаа амжилтыг тэмдэглэж байна. МУИС-ийн бие даасан судалгаанд дурдсанчлан Оюу толгойн уурхай Монгол Улсын төсвийн 10 хувийг дангаар бүрдүүлж буйг тэмдэглэхэд бахархалтай байна.”

“Бид гүний уурхайн огтлох малталтыг эхлүүлж, Оюу толгойн бүрэн үнэ цэнийг нийт ард иргэд, талуудад хүртээхэд улам бүр ойртсоор байна. Огтлох малталтыг эхлүүлэхэд шаардлагатай байгаа шинэчилсэн Нөөцийн тайланг бүртгүүлэх, шинэчилсэн ТЭЗҮ-г Засгийн газрын холбогдох байгууллагууд хүлээн авах ажлууд ойрын хугацаанд дуусна гэж итгэж байна.”

• Аюулгүй ажиллагааг нэн тэргүүнд тавьж гэмтэл, бэртлийн давтамжийн үзүүлэлт 200,000 хүн/цаг тутамд 0.14 байлаа. Энэ нь Оюу толгойн аюулгүй ажиллагааны шилдэг гүйцэтгэлийг батлах бөгөөд харьцуулахад өнгөрсөн улиралд Рио Тинто группийн бусад үйл ажиллагааны дундаж үзүүлэлт 0.39 байжээ.
• Нэг тонн хүдэр боловсруулахад 0.34 метр куб ус нөхөн сэлбэлтээр хэрэглэсэн нь дэлхийн ижил төрлийн уурхайнуудын ашиглалтын дунджаас даруй гурав дахин бага ус ашиглаж байгааг харуулна. Энэ хугацаанд ашигласан усаа дунджаар 89.1 хувийг дахин боловсруулж, 80 хувьд хүргэх зорилтоо давуулан биелүүлжээ.
• Нийт ажилтны 96 хувь нь монголчууд байна.
• Татвар, төлбөр, хураамж хэлбэрээр 503 сая ам.долларыг 2021 оны хоёрдугаар улиралд төлсөн бол нийлбэр дүнгээрээ 2010 оноос хойш 3.4 тэрбум ам.долларыг дээрх хэлбэрээр төлжээ. Үүнд Монголын ханган нийлүүлэгчдэд төлсөн НӨАТ хамаарна.
• Оны эхний хагаст 628 ханган нийлүүлэгчтэй хамтран ажилласны 407 нь үндэсний ханган нийлүүлэгчид байв. Үйл ажиллагааны худалдан авалтынхаа 75 хувийг эдгээр үндэсний ханган нийлүүлэгчдэдээ зарцуулжээ.
• Хоёрдугаар улирлын гүйцэтгэлийн тойм мэдээг эндээс үзнэ үү.

• 2021 оны хоёрдугаар улиралд зэсийн баяжмалыг хэрэглэгчдэд хүргэхэд гуравдугаар сарын 30-ны өдрөөс эхэлсэн хилийн хязгаарлалт нөлөөлж, “Оюу толгой” компани “давагдашгүй хүчин зүйл бүхий нөхцөл байдал” үүссэн гэдгийг зарласан. 2021 оны дөрөвдүгээр сарын 15-ны өдөр бид зэсийн баяжмалыг хэрэглэгчдэд хүргэх ажлыг сэргээсэн бөгөөд ханган нийлүүлэлтийн тасалдлыг зохицуулахын тулд орон нутгийн болон БНХАУ-ын холбогдох албатай хамтран ажиллаж байна. Худалдан авагчдын өмнө хүлээсэн үүргээ биелүүлэх, уурхайн талбар дахь баяжмалын хэмжээг зорилтот түвшинд хүргэх, хилээр гарах баяжмалын цуваа тогтвортой болгох хүртэл “Оюу толгой” компани “давагдашгүй хүчин зүйл бүхий нөхцөл байдал” хэвээр үйлчилсээр байх болно.

“Оюу толгой” үйлдвэрлэлийн мэдээлэл
Үйлдвэрлэл борлуулалтын бүх мэдээллийг 100 хувиар тооцов

Гүний уурхайн төслийн мэдээ

• Монгол Улс дахь “КОВИД-19” цар тахалтай холбоотой өндөржүүлсэн хязгаарлалтууд гүний уурхайн төслийн үр дүнд ихээхэн нөлөөлсөн. Эдгээр хязгаарлалтад нийцүүлэн уурхайн талбар дахь ажиллах хүчний тоог төлөвлөснөөс 25 хувиар доогуур байлгав. Материал тээвэрлэх нэгдүгээр системийн ажил нарийвчилсан тооцоололд дурдсанаас ахицтай байж огтлох малталтыг эхлүүлэхэд дэмжлэг үзүүлэх техникийн шалгуурыг 90 хувь хангаж чадлаа. Цаашид цар тахлын үргэлжилсэн нөлөөлөл, огтлох малталтыг эхлүүлэх техникийн бус шалгуураас үлдсэн ажлууд хамаарна.
• Энэ улиралд налуу амын туузан дамжуулгын ажилд багахан хэмжээний ахиц гарсан бол агааржуулалтын урд болон хойд амын ажилд төлөвлөсөн хэмжээний ахиц гарсангүй. Гэсэн хэдий ч хорио цээрийн хязгаарлалтыг зөөлрүүлж, ажилчдын цар тахлын эсрэг вакцинжуулалтыг эрчимжүүлснээр уурхайн талбар дахь нөөцийг аажмаар сайжруулж байна. Эхний хагас жилд тохиолдсон цар тахлын хязгаарлалт одоо ч манай үйл ажиллагаанд нөлөөлж байгаа ба эдгээр нөлөөллийг тооцоолох ажил үргэлжилж байна.
• Материал тээвэрлэх хоёрдугаар систем, баяжуулах үйлдвэрийн шинэчлэл зэрэг гэрээний дагуу хийх ажлууд төслийг дуусгахад шаардлагатай төсвийн нэмэгдэлтэй холбоотой ТУЗ-өөс батлах хүртэл хойшлоод байна.
• Агааржуулалтын урд болон хойд амын барилгын ажил хойшилсонтой холбоотой болон бусад холбогдох нөлөөллийг тооцсоны дараагаар нэг, хоёрдугаар панелын талаарх мэдээллийг шинэчлэн хүргэнэ.

• Бүх оролцогч талууд гүний уурхайн төслийг урагшлуулах, хэлэлцэж буй асуудлуудад урт хугацааны шийдлийг олохыг эрмэлзэж байна. Өмнө нь мэдэгдэж байсанчлан гүний уурхайн огтлох малталтыг эхлүүлэхэд шаардлагатай шалгууруудыг хангах ёстой юм. Үүнд: шинэчилсэн нөөцийн тайлан, ТЭЗҮ (ОТТЭЗҮ20)-ийг Засгийн газрын холбогдох байгууллагууд бүртгэх, хүлээн авах; Оюу толгойн ТУЗ-өөс гүний уурхайн нарийвчилсан тооцоололтой уялдуулан гүний уурхайн нэмэлт санхүүжилтийг батлах; дөрөвдүгээр сард Рио Тинто ба Туркойз Хилл Ресурсын хооронд байгуулсан гүний уурхайн нэмэлт санхүүжилтийн төлөвлөгөөнд нийцүүлсэн санхүүжилтийн төлөвлөгөөг Оюу толгойн ТУЗ батлах болон Оюу толгойн уурхайг дотоодын эрчим хүчээр хангах ажлыг урагшлуулах
  зэрэг багтана.