Өмнөговь аймаг, Даланзадгад – Оюу Толгой ХХК Өмнөговь аймгийн Засаг Даргын Тамгын Газартай Даланзадгад хотноо баригдах "Бүсийн Соёл, Спортын Цогцолбор"-ын барилгыг хамтран санхүүжүүлэхээр Харилцан Ойлголцлын Санамж Бичигт өнөөдөр гарын үсэг зурлаа.
2009 онд байгуулагдсан Хөрөнгө оруулалтын гэрээний дагуу Оюу Толгой ХХК нь Өмнөговь аймаг болон уурхайн нөлөөллийн бүсийн сумдын эдийн засгийн тогтвортой хөгжилд эерэг нөлөө үзүүлэх үүднээс Өмнөговь аймгийн засаг захиргаа болон орон нутгийн иргэдтэй хагрилцан түншлэл, хамтын ажиллагааг хөгжүүлэх үүрэг хүлээсэн билээ.
Санамж бичигт гарын үсэг зурсантай холбогдуулан Өмнөговь аймгийн Засаг дарга Б.Бадраа "Орчин үеийн барилгын шийдлээр олон улсын болон Монгол улсын барилгын салбарын стандартын дагуу баригдах Соёл, Спортын Цогцолборыг хамтран бүтээн байгуулахаар болсонд Оюу Толгой компанид талархлаа илэрхийлье. Аймаг, бүс нутаг, улсын төдийгүй олон улсын чанартай спорт, урлагийн арга хэмжээнүүд энэ Цогцолборт зохион байгуулагдана. Ирээдүйд дэлхийд нэр алдраа цуурайтуулан, ахмад үеэ залгамжлан гарч ирэх спорт, урлагийн алдар цуутнууд эндээс төрнө гэдэгт эргэлзэхгүй байна." хэмээн тэмдэглэн хэллээ.
Оюу Толгой ХХК-ийн Төлөөлөн Удирдах Зөвлөлийн дарга Г.Батсүх "Оюу Толгой ХХК нь өөрийн нийгмийн үүрэг хариуцлагын хэрэгжилт, бүс нутгийн хөгжлийн зорилтын хүрээнд Өмнөговь аймгийн хөгжлийг дэмжих томоохон хөрөнгө оруулалтуудыг хийсээр байна. Бүс, орон нутгийн дэд бүтэц, үйлдвэрлэл, үйлчилгээ, нэн ялангуяа хүн амын эрүүл аж төрөх ёс, сайн сайхан амьдралыг бүрдүүлэх, хөгжүүлэхэд дэмжлэг үзүүлэн ажиллаж байгаа. Орчин цагийн Соёл, Спортын цогцолбор Даланзадгад сум, болон аймгийн нийт ард иргэдэд ач тусаа өгнө гэдэгт эргэлзэхгүй байна." гэв.
Оюу Толгой ХХК-иас Цогцолборын барилгад 2 сая ам.долларын хөрөнгө оруулалт хийхээр талууд эцэслэн тохирсон болно.
Үйл явдлын фотог энд дарж үзнэ үү.
Хариулт үлдээнэ үү